尋日開會，C部精英盡出，講解下半年既一D計劃。呢個會，通常大家都係訓覺多，但今次唔同。各位高層一反常態，竟然打破緘默，奮力開拖。結果只係份Proposal 傾左成粒鐘，真係極度出乎意料之外。
唔好話部門主管L都掟左一堆問題出黎啦，佢既手下，以致其他部門既副主管二主管都問到極深入，你平時真係好難想像D老細會想知Methodology野。D野咁Stat，普通人邊會理解得到？由此可見呢壇野係真係好重要。
不過C部派得出第三把交椅K同埋佢既得力助手，好明顯都係有備而戰。所以雖然問題同質詢好似雪片咁飛來，自己都差唔多似係俾百萬大軍圍剿之下既槍林彈雨之中，都依然可以神態自若，見招拆招，有時仲見到佢可以反攻番一兩野，絕非長期維持捱打狀態。勁，真係好勁。
有時如果唔駛做Presentation，我地呢D做細既，除左搖旗吶喊之外，當然就係眼定定咁學野。高手過招確實係非同小可架，睇得出D套路真係同睇金庸小說一樣，都係咁Enjoyable。不過例如某些武功如太極功，或者乾坤大挪移，甚至係七傷拳，無番咁上下根底同內力，邊有可能會練到呀。得個睇字，叫開左眼界。
講番我地呢邊，做左兩三年既Project終於結束。總共整左7份deliverables。雖然應該無人理，但總算完成目標，交齊功課。祖宗保佑。
身邊既朋友有時一係就怨無男/女朋友，一係就怨男/女朋友唔夠好。
講到底，都係睇你要求有幾高。同埋，你有無認清自己係咩料到先。
你話我係皇室黎既，流住藍血既貴族，家財千萬，幼承庭訓，舉止優雅儀態萬千不突止，仲要玉樹林峰（Sorry打錯字，但唔想改 XD），天仙下凡。Well，咁無辦法啦，要搵到個真係襯到你既真係好難，有時真係唔止無敵是最寂寞，完美都會好寂寞。你就算多飛來蜢，到頭來無個真係岩，咪又係浪費時間。
唔係話要個好D唔好，呢樣野真係唔係罪。但係到頭來係咪真係會有個咁Perfect既人出現呢？無人答到你。如果要等十年，二十年，三十年，你係咪又真係會繼續痴痴的等呢？一生中最愛又係咪一定代表一生中最好呢？
可能係職業病，有時覺得男女配對呢樣野，同搵份工，老闆搵下屬，下屬都想夾老闆，大家合作愉快，其實目標都係一樣。你做高盛唔會忽然做屈臣氏，而渣車既亦唔會忽然去同米奇老鼠跳舞，到最後，都係希望發展到所長同技能，仲有搵到滿足感。要求太多但又脫離現實，到最後都係迫死自己，咁又何必。
兩個人就算有爆多缺點，但夾得埋，就係臭味相投，同埋往後生活方式大家都承受得到（可能有人覺得住木屋都唔介意）。呢樣野就係最重要既一環，其他野其實唔多駛睇。
不過講呢D野，朋友就會話：你唔明架喇。只好繼續收聲，然後五秒點點頭，繼續聽人訴苦水，食下花生算囉。
人要生存，就會慢慢識得面對現實。就算幾無奈都好，現實就係現實。經濟學理解人既行為就係：你無錢，買唔起商品X，就要買商品Y。無話咩屈唔屈就，總之就係局限下走出最好既一步。
當局限愈黎愈多，人就愈黎愈妥協，甚至麻木左，愈黎愈容易妥協。無論咩野都係一樣，就算連自己係唔係會選到一市之首，佢又係邊個，似乎都好似無咩所謂啦。台灣咁激動，八成投票率，連林青霞都番專程飛番去老家投票，車，咁又點。都係佢地既事啦，關我地咩事喎。唔好煩到我咪仲好。
有時都唔好話咁好高鶩遠，真係期望做到一人一票，但起碼依家既所謂政治人物可唔可以有多番少少台型同說服力？唔好講真才實料喇，連呢D都做唔到，真係選個劉德華仲好啦。
好似最近某兩個政黨咁，你話我打你，佢又話係人地打佢先。大家好似小學玩泥沙咁，唔好話風度咁高要求，連成件事可以邏輯講番出黎都唔得。大家你插我我插你，又無證據，然後忽然間又道歉。叫人想點理解？真係當普羅市民傻架？
至於人地又雙英，我地又雙英，點解又可以咁唔同架呢？Sell政綱之前，有無諗過真係Work架？定係純粹係度玩政治派糖渣，總之邊個選委聽到高興咪講咩囉。有人話豬真係豬咁蠢，但係我又唔覺狼講野真係好閃爍住智慧喎，依家有D愈聽愈驚添──
你就算真係有一人一票，你可以點。掟落鹹水海好過啦。
話說有日我如常搭地鐵，行落扶手電梯到半路，見到有個婦人，睇落年紀唔算後生，但亦都唔算長者，佢側邊有一大袋唔知咩東放左係電梯上面。
咁我行唔到落去啦，正要你眼望我眼，點知佢竟然忽然開口同我講：
「你不如幫我將袋野拎落去，送埋入地鐵好唔好呀？」然後，佢見到我話無問題，就指揮我去中環方向果邊既列車月台。
我伸手一提，發現其實都唔係太重，應該只有大概10kg到。咁助人為快樂之本，我當然唔會推辭既，咁咪拎囉。點知我一拎，佢就即刻放心晒咁，個人好似一支箭咁衝左落去。因為咁樣，令到我有好多疑問：
第一， 佢唔驚我係賊，乘機拎走左佢袋野？唔通我個樣都仲係好好人？
第二， 佢點知我一定係同佢搭同一條線？如果我係柴灣線，咁佢點辦？
第三，如果舊野真係咁重拎唔到，當初佢點樣提入去地鐵站？係佢終於筋疲力盡，定係佢本來就無預計到D野咁重？反正都拎唔到，索性搵人幫手？
雖然我滿腹疑團，但我仍然維持禮貌既微笑。婦人一再強調自己已經好老，拎唔到野，我當然絕對投以信任既眼神啦。我估佢真係好頂唔順，就算係月台，佢都要搶到勁前話要霸位，然後衝到入車廂，都要夾硬截左一個內地遊客既糊，強行霸左個位黎坐……
「真係唔該晒你。」施恩莫望報。任務完成，我就走左去另一個車廂搵位坐，但都仲有第四個疑問：
咁到佢落車果陣，又點算？？呢單野都算奇聞。
好多時，以為既野，都未必岩。
如果以為得黎，往往十次有九次都得，你一定勁過玲玲或者阿文峰（睇清楚，唔係林峰呀！）師傅。快D辭左份工唔好做，一係就同佢地一齊睇風水命理，再唔係投身股海，兩樣都應該好快會發達。
但好似我呢D凡夫俗子，就岩岩調番轉頭，十次有九次以為都係錯既。例如，我今日起身返工，返到Office開電腦一睇，先發現原來我上星期只係寫左四篇文，仲差一篇（唔好問我點解返工第一件事唔係Check e-mail，因為呢樣係第零件事，唔算 XD）。但我星期五果陣我以為明明已經清晒，點解會咁？思覺失調？
而當我又有另一個以為，以為早左返Office今日，應該可以花番少少時間黎補埋呢篇文，所以同自己講唔緊要唔緊要既時候，晴天霹靂，忽然間又彈出一個By noon deadline 既very urgent request，然後同事D仲同我講：「喂我依家出去呀，你搞掂佢啦哈哈哈！」果陣，你話星期一，已經係年廿三，倒數五日放新年假既日子，係幾咁掃興，幾咁無奈（如果有窗打開，一定見到有幾片黃葉飛過 LOL）。
所以，呢個小故事教訓我地，「我以為咩咩咩」都係唔好拎黎做做錯事後想作出既解釋。如果無詳細驗證過，「反正我是信了」，呢個就係你既問題。無說服力之餘，只係俾人覺得呢個只係一個想搪塞過錯既藉口，又何必呢。
（不過要小心「取得平衡」，如果唔係，就會變左質疑大師架啦！小心切記。 XDD）
講左一單新聞咁耐，或者我地都係要講番正經事：就係恭喜林峰，除左蟬聯十大勁歌金曲頒獎典禮既亞太區最受歡迎男歌手之外，仲以勢如破竹之勢，以「Chok」一曲，榮獲金曲金獎！
我自從林峰上年拎左亞太區之後，就成為左佢Fans，覺得佢雖然資歷比古巨基、李克勤等上代、初代三色台契仔淺好多（而印象中克勤都好似未拎過亞太區？），但係人地真係有實力，有台風，有唱功，亦都已經開過唔少演唱會。單係一招咪嘴跳勁舞，已經出神入化，可以同謝檸檬既單線Solo有得揮。佢既前途，我一早就知道，必定無可限量。
至於有人質疑佢首Chok點解可以拎到金曲金獎，呢個簡直係唔需要多問。咪就係Chok出黎架囉？成首歌極易記，都唔多駛唱，黎黎去去只係幾個音節，唔怪得咁膾炙人口啦。另外，我都要指出，呢首會成為金曲金獎中經典中既經典，因為一首咁少人知，咁少人聽既歌，都可以拎到呢個獎，更加顯得佢含金量之高同埋難能可貴。再者，上年JW首唔知咩男人咩Q都拎到，我相信林峰登上事業新高點，更加係well-justified，你地班友，根本唔識野！所以既批評，都係妒忌下既惡意中傷。
D&X就話就影相事件都話要澄清一兩句；三色台完全無需要，都唔知幾理所當然，師奶觀眾大家又受落──一齊為林峰乾杯，Cheers！
前者呼，後者應，群眾既力量，集腋成裘，往往就係咁不可思議。所以掌握實權既人，最怕就係群眾，所以亦最怕民主就係咁解。
不過，「點解香港人唔可以影相，但係大陸人可以呀？」，呢個問題，可謂十分到肉，成功令到本土香港人同內地既衝突「衰多二錢重」．進一步激化。其實最近真係好多同一個問題既報導：
譬如鍾庭耀既身份認知民意調查俾北大人怒插方法偏頗啦；內地大肚婆黎港生仔霸晒D床位，甚至打邊爐啦；大陸人一直黎掃豪宅，推高晒D樓價啦……於是依家阿振英哥出黎宣傳政綱，亦都食正條水，鼓吹推行本地主義，認為要劃分港人港地。
事件當然係D&X自己攞黎衰，但係我覺得住係國際大都會，並且如果仍然覺得自己被稱呼為香港人比中國人或內地人自豪的話，好應該亦都以身作則，記住呢個地方一直都係主張中西方文化兼和並包，唔好玩歧視，亦都唔好一竹篙打一船人。雖然，呢個係歷史上，似乎係人之常情，就係多數歧視少數，但係天下始終希望大同，係講種族融和架嘛。大家自稱龍的傳人，但又你排擠我我排擠你，成何體統呢？
內地孕婦黎衝關生仔，呢個問題有待政府解決。但係其他問題，例如唔俾內地人黎買樓，又係咪真係可行呢？係咪就係咁樓價就唔會上升呢？人口老化既問題，香港既未來勞動力，又靠咩補充呢？香港本地女人又唔肯生，到時唔知邊個去支撐呢個有朝一日超過八百萬人既社會呢？
對於非我族類既人惡意敵視，你其實同D&X都無分別架渣。
當然，你話我係國際知名品牌。吹咩，我係唔係服侍你地班窮鬼呀，大陸佬掟金條埋黎我仆倒去執呀。OK，Fine，咁無問題既，現實的確係咁，不過我會因此對呢個所謂高格品牌有D令人失望囉（雖然我根本無資格去做佢既顧客！XD）。
品牌，或者名牌，之所以受歡迎，或者好多人追捧，因而賣得貴，最基本當然係質素要好高。但係除此以外，人有時亦會開始考慮埋佢間野，究竟道唔道德，或者間野搵既錢，究竟係咪用得其所，所賺既錢，係咪又真係物有所值，等等。有D老字號，真係幾百年以黎，維持住傳統，恪守佢地覺得應該守既信條，並唔係個個客人都Serve，有D如果佢覺得唔賣得，可能會影衰左自己，真係多多錢掟落黎都唔做生意。你可以話佢偏激，好串，但亦都同時博到唔少人既掌聲。
不過D&X有樣花邊新聞係，事件爆發後，竟然有位售貨員係Facebook向住果度狂影相既香港人開火，狂鬧佢地阻住晒做生意，仲叫佢地放馬過黎。當然，每個人都有佢既言論自由，所以我覺得佢做得出呢件事，都預左俾人起底，然後上報紙。到最後仲要慘到係Facebook留言，以本人自稱「真誠道歉」。整件事睇起黎真係極其荒誕，或者呢D就叫同公司形象「一脈相承」。
我其實對位女仔都表示若干同情既。玩命咩，下次想寫野前，起碼都較下個Privacy Setting先呀。有時真係講個比喻，你係Facebook搞得唔好，係對住全世界On Air，即係好似占基利好耐之前拍套戲咁，係對住所有人真人Show渣。好事就話光宗耀祖，衰野都真係有排淤架。
今個禮拜繼續都係廣東話周。
＊
呢輪忙得滯，幾乎連睇報紙或者係上網睇新聞都無時間。不過依家碌下個Facebook / Google+，朋友大多已經將比較注目既新聞同片段Share左出黎，所以睇完都應該唔會有咩野損失。
講開最近鬧得沸沸揚揚既D&X事件，亦都因為香港人一呼百應，結果竟然擁左成千上萬既人走去間店到影相，結果仲成為國際新聞，就連平機會都要出黎做野。不過又係既，一早就知香港年青人鍾意影相，你唔俾佢影？勢係假！
之前已經寫過唔少文，講我地一機在手，幾乎要天下我有。單反唔在講，智能電話亦內置唔少出色既拍攝功能，而且依家又無限子彈，任影唔嬲。你身邊總有一些朋友，真係朝早起身刷牙又影下支新牙膏，然後出街覺得個天好藍又影幾十張，食飯每一個送更加唔再講，所有野都會即刻Upload 上Facebook。大家都玩過不亦樂乎，影相權一早已經唔經唔覺，係香港市民中係一個重要既權利。
所以，你禁我地企係度望，或者唔俾我地入去齋睇唔買，或者都仲唔會激起咁多民怨。但係你唔俾我地影相？真係只能夠講一句自掘墳墓。你話好似港鐵附例咁唔俾人食煙就話合法，唔守唔得。霸道到咁，難怪一下子群情洶湧！
小學果陣，老師教作文，音樂呢樣野，一定配以陶冶性情完句。結果大家雖然唔知究竟陶冶點解，或者只係一知半解，一樣陶冶性情左咁多年。
呢個竟係填鴨式教育既好處/唔好處，你亦都可以話呢個係中文既偉大壯嚴（其實都只係視乎你點睇件事……XD）。
不過今次我唔講中文，反而想講音樂。
講音樂呢D野，本來真係唔應該班門弄斧，有咩搵大音樂家奧絲汀兄黎，可能諸位更加會獲益良多。不過膚淺之見，講下都無壞掛？
音樂，本來係咁美好、幾乎係可以代表人生既一樣藝術，但運用失宜，唔能夠陶冶性情之餘，輕則會令到人心神煩躁，無法集中；重則甚至會暴走發狂，隨時搞到家散人亡，釀成倫常慘劇。例如最近電視媒體就為我地提供左好幾多極佳既例子，包括：
(1) 霞夏下蝦瑕：今日聽同事講網上仲出現十分鐘洗腦版。一聽音樂，即刻諗到呀如意狼君男主角俾刀插流到成地血都要一路爬爬到去岸邊再上船先死bad end。唔好問點解佢唔爬去醫院求醫。不如問點解首歌唔用黎教音律 / 廣東話九聲好過啦。
(2) 小明上深圳：究竟係呢個月，小明上左幾多次深圳？究竟點解李家仁既強制播放率可以直迫Lady Gaga？我日日搭港鐵唔搭巴士，八達通既錢99%都俾晒你，你都要咁樣對我？龍華全線開通晒啦愈玩愈遠？有咁爽仲駛OT？
(3) 甜姐兒主題曲：首歌Melody真係只能夠聽一兩次，日日聽又係會好想打爆電視。尤其是Sweet sweet sweet既發音，係I: 唔係I 黎架。Francis Kong泉下有知，我真係擔心佢唔知點過……
水能載舟，亦能覆舟，信焉。
