【特稿】要戒條不如別拍拖了

週日無事,到處蹓躂,看到某朋友的Blog 轉載了男友的100戒條。嘩,細看下,立即覺得是某香港著名Blogger執筆的作品啊!條款挺Harsh的,如果給甚麼激進分子看到,分分鐘又被列為甚麼港女之作。我在網上翻查了一下,男友有100戒條,但卻沒有人寫關於女友的,明顯是男友向來「不管」這些--即口裡說沒有,但心裡有很多戒條,卻不敢講,結果很令人無所適從。

所以,讓我今天閒極無事,也以此為藍本,「斟酌損益」,寫出100條女友戒條。純粹當消磨一下時間,別認真看待:

  1. 你儘管同其他單身男姓去街傾偈諸餘此類,但唔好俾我發現你仲Enjoy過同我一齊。
  2. 我”jik”你個陣你都唔准縮。
  3. 我無興趣check你既來電顯示,但如果你要check我既,我對你MSN history有興趣d。
  4. 我份工都唔賣笑,所以心情真係唔會日日是好日架。
  5. 基本上我對你著衫無要求,唔好去行山你都踢對high heel出黎就得。
  6. 正因為咁,唔好成日問我著咩衫好。我話著咩都靚,你應該相信並接受,語調由衷,並唔係晦氣說話。
  7. 你舊情人送俾你d野,我唔太清楚,你最好都唔好俾我知道放係邊。因終有一日,我會失去理性,幫你搬屋定點個陣就會神秘失蹤晒,你到時唔好痛哭失聲話無左童年回憶。
  8. 我根本唔會expect你寫情信,所以唔駛多花腦筋。得閒關心下我死活已經夠。
  9. 我唔需要你成日同我報到。但係如果去街比expectation晏既,我希望你會俾個通知我,等我唔駛再等你call自己訓覺先。
  10. 你得閒黎陪我食下飯,講我聽你最近有咩高興或者煩惱,我覺得已經好開心。
  11. 我assume我地只要努力,係可以一生一世。所以我希望你都同我一齊努力去證明呢個assumption係work既。
  12. 唔好立亂未問我意見就買野俾我,愈貴愈要問,好彩我鍾意都還好;我唔鍾意到時又要扮接受,咁大家都係盞搞。
  13. 我都唔鍾意你有咩收收埋埋唔同我講同左第個路人甲Share,咁個男朋友要黎做mud叉?叉電?
  14. 你去街又驚我悶的話,你大可以講「不如我留低陪你」,我會立即叫你「玩得開心d,唔駛理我」。
  15. 我幾時都將你放係我前面,但我都鍾意女朋友多d明白我呢個mind set。
  16. 大時大節紀念日呢d野,通常我記得你都唔記得。所以大家都唔記得既話,值得慶祝。
  17. 偶一為之既污糟貓,可以接受,但你唔好話我知你兩個禮拜無沖涼。
  18. 我係一個慳錢既人,但你唔需要同我慳,或一齊慳。
  19. 你唔需要知道我d鞋碼以及三圍數字,衫褲爛晒我自己曉得去買。你可以俾意見,但如果失驚無神送d貼身用品俾我,我會以為你係我十幾年前既褓姆。
  20. 你可以Shopping,但僅記一句話,叫玩物喪志。
  21. 你一腳踏兩船(或以上)要話我知,等我買定火箭炮。
  22. 食飯前最好講明想食d咩,唔好話無所謂到時又多多要求。
  23. 你覺得熱唔想拖住手,OK,唔好忽然又話人地唔攬住你,我會以為你思覺。
  24. 我份工人工唔多,非常時期你有心理準備同我去大排檔食公仔麵。
  25. 我會忍受遲到,如果你捨得個男朋友無lala假期唔多休息時間都要罰企佢個幾鐘的話,隨便你。
  26. 呢個世界朋友唔係男性就女性,我尊重你既,你都尊重我既。
  27. 我比較少爆粗。你可以爆,但唔好係唔岩既場合爆。
  28. 你可以呃我,但唔好忽然有日自己踢爆個大話,咁樣我會唔知點adapt好,會好難受。
  29. 所以,你唔駛讚我英俊瀟灑,可以慳番。
  30. 我話你勁既野,係真係欣賞你,唔係串你,希望你可以有野可以同我分享。
  31. 好老實講,唔駛成日煩送咩禮物俾我,你已經係我最寶貴既一件禮物。
  32. 如果仲要煩既,咁你自己煩掂佢,唔好問我鍾意咩,因為我地永遠都話「你送既咩都咁鍾意」。
  33. 得閒睇多d書,充實下自己,有好書就推介俾我聽。
  34. 唔想講既野,愈迫我愈唔想講,你唔迫我我會自己講。
  35. 你要講清楚幾時要縱你,幾時要講真說話你聽。
  36. 係街到見到靚女,唔該話俾我聽,等我睇下佢正唔正得過你。
  37. 你發脾氣,我會唔出聲,有咩等你冷靜左先再講。唔係唔理你,係咁做大家都好。
  38. 唔好覺得有時我太緊張你反應過敏好低B,我承認我係一個傻佬。
  39. 我阿爸阿媽好鬼煩,如非必要唔好去掂呢個渾水,除非有我既指引。
  40. Shopping要得我俾意見就要聽,唔好到時一意孤行又話我意見廢,咁我下次一定唔去。
  41. 遇上唔識既野而我又有興趣,我好歡迎你問我,否則我會當你識晒,到我滔滔不絕咁講你又唔明個陣,唔好話我唔理你。
  42. 我希望有時我地可以講下中期有咩目標。如果嫌長期太過唔可以控制的話。
  43. 我希望我地可以一切批評同讚賞我地d朋友,咁樣中肯d。
  44. 我承認我對中國文學有興趣。但你無必要因此去睇三國演義或紅樓夢。
  45. 我寫既小說,你要睇。
  46. 你覺得我做錯既野,可以直接批評我,唔好仲話我好,等我繼續錯落去。
  47. 唔好以為我係男仔會不拘小節到連我生日唔記得我都會一d事都無。
  48. 你唔開心要第一時間第一個話我聽,唔好要我估估下,尤其係我做緊野已經忙到一頭煙個陣。
  49. 我唔去同其他朋友出街,係希望可以有多d時間陪你,咁樣並唔係摺埋。
  50. 你唔需要記得我講過d mud,你並唔係超級電腦,唔好要求自己太高。
  51. 我無期望過你可以為我改變d咩野,但係如果你真係改到,我會感動。
  52. 我明白你恨嫁,但欲速則不達,你知我努力緊,唔好狂俾壓力我。
  53. 想以後有靚d既屋企或者廚房俾你亂咁舞,依家唔該慳少少,除非我忽然中六合彩。
  54. 你覺得有任何一樣野頂唔順我,即刻同我講,睇下我改唔改到。
  55. 關於女性衣裝及化妝品知識,我等你教我。
  56. 當睇世界盃你捧隊英格蘭俾我捧個隊巴西踢出局的話,唔好嬲,同我一齊捧巴西。
  57. 我會希望你俾番d少少既自由時間俾我。
  58. 你嫌我煩的話,我會自動消失。
  59. 我唔會飛人先,所以次次都俾女飛。希望你如無合理解釋的話,唔好飛我。
  60. 你既變化,我有時睇到有時睇唔到,唔好次次都抽我書。
  61. 你可以咩都唔做,但你要有遲d管理好家頭細務既能力。
  62. 我唔介意你肥,但你要有運動,保持健康,因為我太自私,想我死先過你。
  63. 我明白我自己不修邊幅,但有時見面都唔好第一句就話「mud你今日著成咁」,我會想即刻番屋企。
  64. 你要記住你話下次旅行你話一定會同我去。
  65. 我對你認真個陣你當我瘟神,我會忟憎。
  66. 唔好話自己又蠢又樣衰,你咁樣即係質疑我既眼光。
  67. 唔好expect我病緊個陣仲同平時一樣個腦每分鐘有二千轉。
  68. 你黎M個陣最好單聲先,我無辦法勁到曉自己estimate。到時你發脾氣又賴呢樣,我會覺得你亂咁黎。
  69. 我唔開心你又諗唔到咩可以令我開心d,由我啦。我訓完覺就無咩事架喇。
  70. 我極度歡迎你check我任何history,因為根本上除左同你講野都無咩其他女仔肯同我講野,再者我行得正企得正。
  71. 我無咩興趣再識其他女仔,你應該覺得高興。
  72. 真係食你既公仔麵我願意食一世。
  73. 有機會等你試下我煮既野係幾難食,但係等我有時間練習下先。
  74. 我會多d係中環發掘有d咩好食話你聽,你同朋友如果有餐廳食到好食都要單聲。
  75. 我食極都唔肥架,唔好怪我,你驚企埋一齊影肥你既話你自己要節約。
  76. 我唔敢諗分手呢樣野,太恐怖。所以唔係真係想講唔該唔好講。
  77. 你可以生活頹廢,但成日呻悶我幫唔到你我都幾難受。
  78. 我知道你想要晒我全部時間,但依家未得既時候,你要體諒。你驚到時四五十退休你對我唔會對到厭咩。
  79. 如果你愛我,我會覺得你唔會想我做d唔想做既野。
  80. 我成日唔太想郁,你可以迫我去做運動。
  81. 唔介意朝早叫你起身,但你都要起到身先得架!
  82. 你並唔係我既一件工具,所以談唔上咩功用。只要你開心,我就開心。
  83. 有野我提供左意見到最後你無聽,衰左,唔好話我當初無講。
  84. 我好少會打搞到需要你幫忙,如果有,一定係好緊要既事。
  85. 無驚喜俾到你既時候,並唔係無橋,而係無時間。
  86. 你應承左既野唔做,咁既話,我應承你既野一樣都唔駛做。
  87. 我會攬住個手提電話訓,所以夜晚訓唔著就要打俾我。
  88. 我鍾意長頭髮,但唔介意你夏天剪短,一樣好睇。
  89. 要送花就要開聲,但唔好一邊話要一邊又話好貴。
  90. 當講到室外又唔好,室內又唔鍾意,無地方好去我會提議就咁留係屋企。
  91. 同樣,我無表情係我對左十幾個鐘個mon,已經做到五官硬直晒。俾唔到出色反應你我願意道歉。
  92. 男仔都會呷醋,只係不動聲色咁解,如果你忽然發覺我對某人詞鋒特別銳利,你最好同佢企遠d。
  93. 我會希望聽多d關於你過去既故事,因為我鍾意聽故仔。
  94. 暫時黎講,工作既位置只係家庭同愛情既後面,所以都好重要。佢disturb到我地係無可避免既事,你要忍耐。
  95. 我唔開心好多時唔係你既錯,唔好因為咁而令你唔高興之餘到頭來我要安慰番你轉頭。
  96. 你著得sexy無問題,我會同你研究仲差幾遠先會走光俾你做reference添。
  97. 我精神狀態唔好就會唔想見你個邊d friend,以免我靜晒影響左成個party。
  98. 如果你覺得我係辦公室都要同你傾電話講大大聲我愛你,你可能揀錯時候。
  99. 係唔係AA制由你決定,最好講清楚。我樂意俾錢。
  100. 唔可以夾硬將我要陪屋企人既時間都加埋落自己度。

【附註】睇完覺得好驚?唔緊要,基本上一百條除左要愛我珍惜我之外,全部都唔駛守。

Share