其實無所謂吉野家牛

之前嘅夢見麥記叔叔炸雞叔叔篇,引起廣泛迴響。大家似乎都覺得應該繼續寫多少少有關快餐連鎖嘅野。有中學同學G就提議,自己飄零喺外地,都好耐無食過吉野家,不如寫下吉野家等佢可以懷緬下啦?我呢個人既性格,不嬲都係從善如流,如果要求並非無理,都一定會樂於接受嘅。

但係細心一諗,其實吉野家係無所謂吉野家牛作為吉祥物架喎!

就好似喺香港,你從來無見過一隻牛會幫吉野家賣廣告。而吉野家嘅標誌,又或者係Icon,都無咩特別,除左你老遠見到個橙色招牌、黑色嘅日本湛亭流字樣大大隻寫住「吉野家」你就知道佢係你想搵嘅牛肉飯店之外,佢真係平實得有些少過份。你如果失驚無神,走去訪問十個食緊特盛牛肉飯既人,質詢佢地,要十秒內答,呢間野嘅註冊商標係咩,我估都分分鐘無人答到你。

(吉野家個標誌係牛角,一方面指牛,另一方面指既係日文羅馬拼寫Yoshinoya的”Y”;外面有一條繩整成一個圓圈圍住隻角,呢條繩亦有兩解:繩狀係指相撲嘅橫綱級,即係頂級既意思;而繩索亦可以視之為有27粒米。整個構圖就係講出吉野家賣嘅,係「最頂級既牛肉飯」。咁簡單原來入面都咁精密,尤如鈔票防偽一樣,問你服未。)

不過其實寫到呢度,我最想問嘅一個問題都係,吉野家雖然無吉野家牛幫手做宣傳,但我記得電視上有關佢間店嘅廣告反而出現個另外一隻動物,不過搞笑既係,呢隻竟然係一隻穿工人褲既卡通豬。點解牛肉飯店,要用一隻豬黎做旁白?呢個謎題,相信同要了解麥記入面果幾隻舊時成日陪住小飛飛一齊嘅啦啦隊打氣球狀生物究竟係咩,一樣需要費煞思量!

Share