Chok得有道理

講左一單新聞咁耐,或者我地都係要講番正經事:就係恭喜林峰,除左蟬聯十大勁歌金曲頒獎典禮既亞太區最受歡迎男歌手之外,仲以勢如破竹之勢,以「Chok」一曲,榮獲金曲金獎!

我自從林峰上年拎左亞太區之後,就成為左佢Fans,覺得佢雖然資歷比古巨基、李克勤等上代、初代三色台契仔淺好多(而印象中克勤都好似未拎過亞太區?),但係人地真係有實力,有台風,有唱功,亦都已經開過唔少演唱會。單係一招咪嘴跳勁舞,已經出神入化,可以同謝檸檬既單線Solo有得揮。佢既前途,我一早就知道,必定無可限量。

至於有人質疑佢首Chok點解可以拎到金曲金獎,呢個簡直係唔需要多問。咪就係Chok出黎架囉?成首歌極易記,都唔多駛唱,黎黎去去只係幾個音節,唔怪得咁膾炙人口啦。另外,我都要指出,呢首會成為金曲金獎中經典中既經典,因為一首咁少人知,咁少人聽既歌,都可以拎到呢個獎,更加顯得佢含金量之高同埋難能可貴。再者,上年JW首唔知咩男人咩Q都拎到,我相信林峰登上事業新高點,更加係well-justified,你地班友,根本唔識野!所以既批評,都係妒忌下既惡意中傷。

D&X就話就影相事件都話要澄清一兩句;三色台完全無需要,都唔知幾理所當然,師奶觀眾大家又受落──一齊為林峰乾杯,Cheers!

Share

發表迴響

你的電子郵件位址並不會被公開。 必要欄位標記為 *